Jayyed Sultan 🇵🇰

اسپیکر خیبرپختونخوا اسمبلی بابر سلیم سواتی نے صوبائی اسمبلی کے معزز اراکین کی سیکیورٹی واپس لینے یا منقطع کرنے کے معاملے پر شدید تشویش کا اظہار کرتے ہوئے انسپکٹر جنرل آف پولیس خیبرپختونخوا کو ہنگامی مراسلہ ارسال کر دیا ہے۔ مراسلے میں واضح کیا گیا ہے کہ خیبرپختونخوا اسمبلی کے اراکین کو سیکیورٹی کی فراہمی خیبرپختونخوا اسمبلی (اختیارات، استثنیٰ اور مراعات) ایکٹ 2026 کے تحت قانونی تقاضوں سے مشروط ہے، لہٰذا کسی بھی رکن کی سیکیورٹی مناسب قانونی جواز اور متعلقہ قانون پر عمل درآمد کے بغیر واپس نہیں لی جا سکتی۔ اسپیکر بابر سلیم سواتی نے ہدایت کی ہے کہ صوبائی اسمبلی کے کسی بھی رکن کی حفاظت پر مامور سیکیورٹی اہلکاروں کو قانونی جواز اور مقررہ ضابطے کی تکمیل کے بغیر واپس نہ بلایا جائے، نہ ہی ان کی تعیناتی منقطع کی جائے۔ مزید برآں، جن اراکین کی سیکیورٹی پہلے ہی واپس لی جا چکی ہے، اسے فوری طور پر بحال کیا جائے۔ مراسلے میں خبردار کیا گیا ہے کہ صوبے کی موجودہ سیکیورٹی صورتحال میں اراکین اسمبلی کی سیکیورٹی واپس لینے سے انہیں سنگین خطرات لاحق ہو سکتے ہیں۔ ایسی کسی بھی کارروائی کے نتیجے میں کسی رکن کو نقصان پہنچنے یا ناخوشگوار واقعے کی صورت میں معاملے کو سنجیدگی سے لیتے ہوئے متعلقہ قانون کے مطابق کارروائی کی جائے گی۔ اسپیکر خیبرپختونخوا اسمبلی نے اس امر پر زور دیا ہے کہ منتخب عوامی نمائندوں کی جان و مال کا تحفظ یقینی بنانا اور ان کی سیکیورٹی سے متعلق قانونی تقاضوں کی پاسداری کرنا ناگزیر ہے