أنا

الا يارب لا تجعلني احتاج الخلايق يوم ولو ضاقت بي الدنيا حياتي الستر ضافيها . والا يا وقت لا تقسى وهوّنها على الزيزوم قبل تشمت رخوم القوم لا كبرت دعاويها . على قول المثل ما للحمول إلاّ كبير القوم فعول النّاس تعْرف مثل ما تعْرف بـ اساميها . ليا طاح الكبير اللّي عليه العلم جات علوم تبا تلقى ضعوف الخلق تومي لك بـ اياديها . الا وش حيلة اللّي عاند الدنيا بقوّ عزوم ولا تصفى له الدنيا وهو عيّا يصافيها . يشوف الهم من غدر الزمان ولا عليه اللوم ومن يلقى لْـ جروح الوقت دكتورن يداويها . يسج بهاجسه عن جلسة العالم وهو مهموم ولو به حيلتن يقدر يسوّيها يسوّيها . يسير بركب هالدنيا على قول العرب منجوم ليا صارت امور النّاس حاميها حراميها . ولا يدري بها الدنيا من الظالم من المظلوم يلدّ العين عن بعض السوالف ما يدانيها . يردّه عن كثير الهرج ودموعه قديم سلوم وقد قالوا العرب من له عوايد ما يخلّيها . يقولون الزمان الشين ما يبطي ولاهو دوم وانا اقول الزمان اخلف بهالعالم هقاويها . كسير الوقت لو يعطي مشاعر للعرب محروم ليا مرّت به الذكرى عسى المولى يعدّيها . ليا منّه نصف ليله يهوجس ما يجيه النّوم تخاطفْه الهموم اللّي تكدّر صدر راعيها . ولا منّه ذكر بـ ان القدر في ضيقته محتوم تبسّم وانشرح صدره من الضيقه وطاريها