"دو مقدس انگلیاں جو آج مجروح ہوئیں" (انسانیت سے حیوانیت کا سفر بس تیس سیکنڈ میں ) آج میں نے ملتان میں انسانیت کو تحت الثری میں گرتے دیکھا - اشرف المخلوقات کو حیوان کے روپ میں دیکھا - امیری کو بہت ہی مفلس اور کنگال دیکھا - اور بس ایک بچے کو یتیم نہی بلکہ ایک پورے نظام کو یتیم دیکھا جس کو یہ بھی نہیں یقین کہ اس یتیم کے قتل کے بعد اس کے قاتلوں کو سزا ہو گی بھی کہ نہیں - یہ اس امت کے کچھ امتیوں کے کرتوت ہیں جس کے نبی صلی الله علیہ وسلم نے دو انگلیاں اٹھا کر یہ فرمایا تھا کہ "یتیم کی کفالت کرنے والا جنت میں میرے ساتھ یوں قریب ہوگا جیسے یہ میری دو انگلیاں ساتھ ساتھ ہیں " - قصور ؟ بس یہ تھا کہ الیکٹریشن بچے نے کام سے انکار کردیا کہ باقی کام کل کرونگا - پہلا سوال تو یہ اٹھتا ہے کہ پندرہ سال کی عمر میں جس ہاتھ میں قلم اور بستہ ہونا چاہیے تھا اس میں پیچ کس اور پلاس کیونکر آیا ؟ دوسرا سوال یہ ہے کہ اگر حالات اور نظام کے سبب ایسا ہو بھی گیا تو اس ہاتھ کو کسی نے کندھا دینے کی بجاے یوں گاڑی تلے کیوں روند دیا ؟ اور سب سے بڑا سوال یہ ہے کہ ہمارے معاشرے میں قانون اتنا کمزور کیسے ہوا کہ کسی کو اتنی ہلا شیری ہو کہ میں اگر سر بازار کسی کو گاڑی تلے روند بھی دونگا تو مجھے نظام میں فرار اور گنجائش مل سکتی ہے ؟ میں بتاتا ہوں کہ ہمارا یہ معاشرہ اتنا جنگلی کیسے ہوا - اتنا دیدہ دلیر کیوں کر ہوا - جب یہ معاشرہ کسی شاہ رخ جتوئی کو کسی شاہزیب خان کا سرعام قتل کرنے کے بعد پروٹوکول سے دوبئی جاتے دیکھتا ہے - کسی ایس پی راوو انوار کو کسی نقیب الله کا قتل کرنے کے بعد رہا ہوتا دیکھتا ہے - کسی بلوچ ایم پی اے عبدل المجید خان اچکزئی کو اپنی کار سے ایک پولیس کانسٹیبل حاجی عطااللہ دشتی کو چوک میں کچلنے کے بعد رہا ہوتا دیکھتا ہے - کراچی کی کسی نتاشا دانش کو اپنی گاڑی سے کسی عمران عارف اور اس کی بیٹی آمنہ کو کچلنے کے بعد انگلیاں گھما گھما کر یہ کہتے سنتا ہے کہ میرے باپ کی بہت پہنچ ہے اور پھر دو سال بعد اس پہنچ کی وجہ سے اس کو آزاد ہوتے دیکھتا ہے تو اس کے سب کونشس (subconscious) ' اس کے لاشعور میں یہ بات بیٹھ جاتی ہے کہ میں بھی ایسا کرکے کوئی جگاڑ لگاونگا- یہ ہے اصل سانحہ- اس بچے کی ہلاکت ایک حادثہ ہے (نہیں ہے تو کچھ ماہ میں ثابت ہوجائیگا ) اصل سانحہ یہ ہے کہ ہم میں سے کسی کو یہ سو فیصد یقین نہی کہ اتنا کھلا قتل کرکے بھی کیا ان قاتلوں کو سزا ہوگی کہ نہیں ؟ اس ملک میں ہر جگہ "سیٹنگ " ہوجاتی ہے - اس سیٹینگ کے پانچ مرحلے ہونگے - پہلا مرحلہ یہ ہوگا کہ اس خبر کو وقت کے ساتھ دبنے دیا جائیگا - دوسرے مرحلے میں ثابت کیا جائیگا کہ بچہ گھر سے موبائل چوری کرکے بھاگا تھا جس کے تعاقب میں مالکان گاڑی پر پیچھے آیے - تیسرے مرحلے میں مالکان کی نیت صاف بتائی جائیگی کہ وہ بس تعاقب کر رہے تھے ' مارنے کا ارادہ نہیں تھا ' اور ان کا کوئی کریمنل ریکارڈ بھی نہی- چوتھے مرحلے میں گاڑی کی بریکس فیل قرار پائینگی کہ مالکان کو بھی نہیں معلوم ہوا کہ بریک خراب تھے اور یہ ایک حادثہ تھا- ان بریکس کی خرابی کا سرٹیفکیٹ کسی اچھی ورکشا پ سے بن جائیگا - اور آخری مرحلے میں اس یتیم خانے کو کوئی ڈونیشن یا اس بچے کہ کسی والی وارث کو کوئی رقم دے کر معامله ختم ہوجائیگا - یہ پانچ مراحل جو میں نے بیان کیے ؛ یہ ہے اصل سانحہ - یہ وہ پانچ سیڑھیاں ہیں جن پر چل کر ہم انسانیت کی معراج سے حیوانیت کی پستی کا سفر طے کرتے ہیں - اوج ثریہ سے تحت الثری میں غوطہ لگاتے ہیں - اور اس عمل میں ہمارا پورا معاشرہ پورا نظام ذمے دار ہے - آج میری ساری دوپہر بہت نڈھال گزری - میں رویا - میں آنسوؤں سے رویا - کہ میرے سامنے بار بار وہ بچہ بھاگتا آجاتا تھا جو اس امید پر پوری جان مار کر بھاگ رہا تھا کہ شاید گلی کے کسی نکر پر ان حیوانوں کی انسانیت جاگ جائے- مجھے یقین ہے وہ بچہ جنت میں اپنے نبی صلی اللہ علیھ وسلم کے ساتھ ہوگا - اور ان کی دو انگلیاں پکڑ کر بتائیگا کہ میری کفالت کی ترغیب کیلئے آپ نے کبھی جو یہ مقدس انگلیاں اٹھائی تھیں ' آپ کے دو امتیوں نے ان انگلیوں کو مجروح کیا ہے - اب مجھے یہ انگلیاں تھامنی ہیں ' اب مجھ یتیم کو براہ راست آپ کے زیر کفالت آنا ہے کہ آپ کی امت اب اس قابل نہیں رہی کہ یتیموں کی دادرسی کرسکے - اس سے زیادہ میں نہیں لکھ سکتا - قلم ساتھ چھوڑ گیا - روشنائی ختم ہوگئی اور آنکھیں پھر بھر گئی - حادثے سے بڑا سانحہ یہ ہوا لوگ ٹھہرے نہیں حادثا دیکھ کر قلم کی جسارت وقاص نواز ---------------------------------------------------