Njya ntekereza ku mwangavu uri mu ishuri, uturuka mu muryango udafite ubushobozi bwo kugura ibikoresho by’isuku byifashishwa mu gihe cy’imihango (dore ko bihenze ubu kamwe ntaho wapfa kukabona munsi y’amafranga 1200 Kandi umuntu ashobora gukenera ipaki zirenze imwe buri kwezi) nkumva arambabaje cyane! Ubundi kuki biriya bikoresho bihenda kuriya mu buryo tubibona, kandi ibiba ku bakobwa ari karemano atari ubushake bwabo? Bagakwiye koroherezwa kubibona. Umwana utabonye biriya bikoresho ndahamya ko imyigire ye icumbagira, habamo gusiba ishuri abandi bakiga adahari, yazabazwa agatsindwa, ipfunwe ritera ikibazo ubuzima bwe bwo mu mutwe, maze rya terambere twifuriza umukobwa rikaba riradindiye. Cyo rero nimuze, iki kibazo tukigire icyacu, buri wese arebe icyo yakora ngo umwangavu yoroherwe no kugira isuku ituma agenda, yiga yemye, atuje. Ubuvugizi bwacu ni ingenzi ngo igiciro kibe kiri hasi, ariko kandi Leta, imiryango itegamiye kuri Leta, inzego z’abikorera, n’abantu ku giti cyabo, buri wese arebe icyo yafasha abangavu kugira ngo iterambere ryabo rireke kudindizwa n’ubushobozi bucye.