Faheemkhan

1/2 سلمان اکرم راجہ صاحب، آپ کا حالیہ بیان نہایت افسوس ناک، غیر ذمہ دارانہ اور پاکستان تحریک انصاف کے داخلی اتحاد کے لیے نقصان دہ ہے۔ ایک ایسے وقت میں جب پارٹی غیر معمولی سیاسی مشکلات سے دوچار ہے، اپنے ہی منتخب نمائندوں کے خلاف مبہم الزامات اور تضحیک آمیز زبان استعمال کرنا کسی ذمہ دار قیادت کو زیب نہیں دیتا۔ آپ نے ’’غیر جمہوری فیصلہ سازوں‘‘ اور ایک مبینہ گروپ کی سازش کا ذکر کیا ہے۔ پہلے یہ واضح کریں کہ یہ لوگ کون ہیں؟ کن اراکینِ اسمبلی پر الزام عائد کیا جا رہا ہے کہ وہ عمران خان اور سیاسی کمیٹی کی اجازت کے بغیر صوبائی صدر یا آئندہ وزیراعلیٰ کا فیصلہ کرنا چاہتے ہیں؟ اگر آپ کے پاس شواہد ہیں تو نام سامنے لائیں۔ اسی طرح یہ سنگین الزام کہ کسی گروپ نے وزیراعلیٰ محمد سہیل آفریدی اور ان کی ٹیم سے رابطہ منقطع کرکے ایمرجنسی اور گورنر راج کی راہ ہموار کی، کس بنیاد پر لگایا جا رہا ہے؟ آپ تحقیقات کی بات کرتے ہیں۔ کون سی تحقیقات، کس کے حکم پر اور کس مجاز فورم کے تحت ہو رہی ہیں؟ اگر تحقیقات جاری ہیں تو پارٹی کو ان کا علم کیوں نہیں؟ جنید اکبر ہمارے بھائی اور صوبائی صدر ہیں، جن کی جلد بازیابی کے لیے ہم دعاگو ہیں۔ اگر ان کی غیر موجودگی میں علی اصغر خان کو قائم مقام صدر مقرر کیا گیا ہے تو اس کا باضابطہ نوٹیفکیشن کہاں ہے اور یہ اختیار کس نے استعمال کیا؟ آپ شاید بھول رہے ہیں کہ خیبرپختونخوا ہمیشہ عمران خان کے ساتھ کھڑا رہا ہے۔ یہ وہ صوبہ ہے جہاں کے کارکنوں اور منتخب نمائندوں نے گرفتاریاں برداشت کیں، تشدد اور نو مئی کے بعد پیدا ہونے والی شدید مشکلات کا سامنا کیا، مگر اپنے قائد اور نظریے سے وابستگی نہیں چھوڑی۔ انہی لوگوں نے 2024 کے انتخابات میں کامیابی حاصل کی، اپنے مینڈیٹ کا دفاع کیا اور مشکل ترین حالات میں بھی پارٹی کا پرچم بلند رکھا۔ خیبرپختونخوا میں تحریک انصاف کی طویل سیاسی کامیابیوں اور مختلف ادوار میں اکثریت کے ساتھ حکومت سازی کے پیچھے انہی وفادار کارکنوں اور نمائندوں کی برسوں کی جدوجہد ہے۔ انہی لوگوں نے عمران خان کی کال پر بار بار اسلام آباد کی جانب مارچ کیا، تین سے زائد مرتبہ غیر معمولی خطرات اور رکاوٹوں کا سامنا کیا۔ افسوس کہ ان مشکل مواقع پر بعض مرکزی ذمہ داران کا عملی کردار اور موجودگی وہ نہیں تھی جس کی کارکن توقع رکھتے تھے۔ اس کا حساب بھی پارٹی کے سامنے آنا چاہیے۔ گزشتہ ایک سال کے دوران قیادت کے متعدد فیصلوں اور سیاسی حکمتِ عملی کے نتائج پر سنجیدہ سوالات موجود ہیں۔ ان فیصلوں کے اثرات صرف عمران خان اور جیلوں میں قید ہمارے ساتھیوں تک محدود نہیں رہے بلکہ ملک بھر کے کارکنوں نے بھی ان کی قیمت ادا کی ہے۔ آج پارٹی جس سنگین سیاسی اور تنظیمی بحران سے گزر رہی ہے، اس میں الزام تراشی کے بجائے قیادت کی کارکردگی، فیصلوں اور ذمہ داریوں کا شفاف جائزہ ضروری ہے۔ اگر خیبرپختونخوا کی پارلیمانی پارٹی اپنے اندر مشاورت کرکے موجودہ بحران کا کوئی آئینی اور سیاسی حل تلاش کرنا چاہتی ہے تو چند افراد کو کس نے یہ اختیار دیا ہے کہ وہ ان منتخب نمائندوں کو غدار، سازشی یا غیر جمہوری قرار دیں؟ ایک بنیادی سوال کا جواب بھی دیجیے۔ جب قومی اسمبلی کے اراکین کے استعفوں کے معاملے پر یہ مؤقف اختیار کیا جا سکتا ہے کہ عمران خان کی واضح ہدایت کے بغیر سیاسی کمیٹی یا کور کمیٹی کا فیصلہ قبول نہیں کیا جائے گا، تو خیبرپختونخوا کے اراکینِ اسمبلی کے لیے یہی اصول کیوں نہیں؟ اگر وہ کہتے ہیں کہ عمران خان سے ملاقات اور براہِ راست رہنمائی ممکن ہونے تک صوبے کے اہم سیاسی و پارلیمانی معاملات پر اپنی پارلیمانی پارٹی کی مشاورت سے فیصلہ کریں گے، تو اس میں اعتراض کی کیا بات ہے؟ ایک ہی جماعت میں ایک ہی اصول کا اطلاق سب پر یکساں کیوں نہیں ہونا چاہیے؟ آپ گزشتہ ایک ہفتے میں دوسری مرتبہ ’’سانپوں اور سنپولیوں‘‘ جیسی اصطلاحات استعمال کر رہے ہیں۔ واضح کیجیے کہ ان الفاظ سے آپ کی مراد کون لوگ ہیں؟ اگر یہ اشارہ خیبرپختونخوا کے اراکینِ اسمبلی کی جانب ہے تو یہ ان لوگوں کی توہین ہے جنہوں نے بیس، پچیس برس عمران خان کے ساتھ سیاسی جدوجہد کی اور آج بھی تمام مشکلات کے باوجود پارٹی کے ساتھ کھڑے ہیں۔ یہ جماعت عمران خان کی ہے۔ ہمیں کسی سے وفاداری کے سرٹیفکیٹ درکار نہیں، اور نہ ہی کسی کو یہ اختیار حاصل ہے کہ وہ ہماری سیاسی وفاداری پر فیصلے صادر کرے یا ہمیں غداری کے سرٹیفکیٹ بانٹے۔ پارٹی سے وفاداری کا فیصلہ چند افراد کی پسند و ناپسند سے نہیں بلکہ برسوں کی جدوجہد، قربانیوں اور عملی کردار سے ہوتا ہے…. Continued