Fabass

Carta aberta de @mmourino a @Madonna ⋄⋄⋄ Benquerida Madonna, Escríboche esta carta porque precisamos da túa axuda. O 29 de xullo de 1990 actuaches no estadio do Celta de Vigo, o club de fútbol do que son presidenta. Aquela noite vestiches a nosa camiseta celeste. Esa lembranza segue moi viva entre a nosa afección. A túa imaxe coa nosa camiseta converteuse nun mito e forma parte desa historia do Celta que tamén se escribe fóra do terreo de xogo. Moitos ven en todo isto unha simple anécdota. Pero a min gústame pensar que nada sucede por casualidade. Aínda que non foi a única camiseta de fútbol que vestiches sobre un escenario, esa imaxe comezou a brillar doutro xeito co paso dos anos. Porque entendemos mellor o que defendías daquela: cuestionar o establecido e facer fronte a quen pretende dicirche o que podes ou non podes facer. No club que presido recoñecémonos nesa maneira de estar no mundo. Por iso temos a ilusión de atopar esta prenda. Esta procura non é un capricho; é un acto de memoria, é patrimonio emocional do noso club. O vindeiro venres 6 de marzo queremos dedicarche un xesto de agarimo desde a nosa casa, o estadio de Balaídos. Será a partir das 20.45 h, antes do partido Celta - Real Madrid, coa intención de formularche con cariño esta pregunta: Tela ti? Se sabes onde pode estar ou queres axudarnos, por favor, contacta por mensaxe privada. Con admiración, Marián Mouriño Terrazo Presidenta Real Club Celta de Vigo