Eng. Mahmoud | Market Analyst 📊

قصة التلاعب القذر اللي عملته Binance النهاردة بسيط جدًا.. تخيل إنك بتداول حاليًا وعندك مراكز في السوق على أساس قواعد معينة، زي مثلًا نسب الرافعة (Leverage) والهامش (Margin Tiers). فجأة كدة بدون مقدمات.. المنصة غيرت القواعد دي بمزاجها كدة، وقالت التغيير ده هيكون بأثر رجعي.. يعني التغيير مش هيأثر على المراكز الجديدة اللي هتبقى مضطرة تتداول وفقا للقواعد الجديدة.. لا.. ده التأثير ده هيشمل المراكز القديمة والجديدة. مش بس كدة.. ده الإعلان تم نشره واتنفذ في نفس اليوم، وفي خلال وقت قليل جدًا لا يسمح لكل المتداولين إنهم يستعدوا للتغيير. التلاعب القذر ده اتسبب في تصفية عدد ضخم من المتداولين، منهم واحد خسر 4 مليون دولار في مركز Long على عملة ACT. في ناس للأسف مش فاهمة وحاولت تفسر اللي حصل إن صانع السوق Wintermute هو سبب الهبوط بسبب بيع كميات ضخمة من العملات اللي كانت ضمن إعلان بينانس.. وده غير صحيح. اللي شركة Wintermute عملته باختصار هو تداول بالمراجحة (Arbitrage Trading/Arbing). سعر العملات اللي بينانس تلاعبت فيها On-Chain كان أعلى من سعرها المنهار على بينانس نفسها، فالشركة باعت عملاتها على منصات التداول اللا مركزية.. واشترت نفس الكمية (أو أكثر غالبا) من بينانس بسعر أقل، وكسبت الفرق بين السعر على بينانس والسعر On-Chain. اللي Binance بتعمله في الفترة الأخيرة دي غير طبيعي.. ولا يمكن يكون سببه الربح وسرقة المتداولين زي ما اتعودت المنصة.. اللي بيحصل ده بيقول إن Binance عندها مشكلة داخلية كبيرة جدا (غالبا فجوة مالية) بتحاول تتعامل معاها بكل الطرق الغير مشروعة.. وده هتلاحظه في كمية التلاعب الضخم وعدد العملات السكام اللي تم إدراجها في الفترة الأخيرة، ودور CZ في الترويج للعملات دي، وعدد المشاريع الضخم اللي تم إدراجها على الـ Launchpad وأمور أخرى. أنصح أي حد عنده رصيد أو بيتداول على بينانس يبدأ ياخد حذره ويتعامل مع الموقف بجدية.