முதல் குண்டில் வலது கண் சிதறிப் போனது… அதன் பின் பாய்ந்து வந்த 8 குண்டுகள் உடலைச் சல்லடையாக்கியது… அப்படியிருந்தும் அந்த மனிதன் சரியவில்லை! சினிமாவில் மட்டுமே பார்த்து பழகிய காட்சி. நாயகனின் உடலில் குண்டுகள் பாய்கின்றன; ரத்தம் சொட்ட சொட்ட கீழே விழப்போகும் தருணத்திலும் அவன் எழுந்து வந்து வில்லனை வீழ்த்துகிறான். ஆனால் இது சினிமா அல்ல. காஷ்மீரின் பனிமலைகள் சாட்சியாக நிற்கும் கசப்பான நிஜம்! ஆண்டு 2017, பிப்ரவரி 14. காஷ்மீரின் பந்திப்போரா என்ற பகுதியில் கிடைத்த ரகசிய தகவலின் அடிப்படையில், CRPF 45-வது பட்டாலியன் கமாண்டன்ட் சேதன் குமார் சீட்டா மற்றும் அவரது குழு தீவிரவாதிகளின் மறைவிடத்தை முற்றுகையிடுகின்றனர். முன்நின்று வழிநடத்துவது சேதன் குமார் சீட்டாவேதான். அப்போது மின்னலைப் போல தீவிரவாதிகளின் திடீர் தாக்குதல்! முதல் குண்டு நேராக அவரது முகத்தை நோக்கி பாய்ந்தது. அது நேரே வலது கண்ணில் பதிந்தது! கண் சேதமடைந்து பார்வை மங்கியது. தொடர்ந்து வந்த 8 குண்டுகள் தலை, வயிறு, கைகள், இடுப்பு என உடலெங்கும் துளைத்துக்கொண்டே சென்றன. உடலை சல்லடையாக்கியது ரத்தம் பீறிட்டு ஓடிய தருணம். சாதாரண மனிதர் என்றால் வலியால் துடித்து மண்ணில் விழ வேண்டிய நேரம். ஆனால் ரத்தத்தில் நனைந்த உடலுடன், மயக்கம் வருவதற்கு முன் வரை அவர் தீவிரவாதிகளுக்கு எதிரான தாக்குதலைத் தொடர்ந்தார். மரணத்தின் விளிம்பிலிருந்து அவர் சுட்டது 16 ரவுண்ட் தோட்டாக்கள் ! அந்த எதிர்தாக்குதலில் லஷ்கர்-ஏ-தய்பாவின் கொடூர தீவிரவாதி ‘அபு’ சுட்டுக் கொல்லப்பட்டான். எதிரி வீழ்ந்ததை உறுதி செய்த பின்னரே சேதன் குமார் சீட்டா தரையில் சரிந்தார். பின்னர், எய்ம்ஸ் மருத்துவமனையின் அவசர பிரிவில் மரணத்துடன் நேரடி போராட்டம். தலையோடு உடைந்திருந்தது; வாரங்களாக கோமாவில் இருந்தார். “இனி திரும்ப முடியாது” என்று தீர்ப்பளித்தவர்களை அதிர்ச்சியடையச் செய்து, அவர் மீண்டும் வாழ்க்கைக்குத் திரும்பினார். இன்று, இழந்த கண்ணுக்குப் பதிலாக இரட்டிப்பு ஒளியுடன் கூடிய தன்னம்பிக்கையோடு, ‘கீர்த்தி சக்ரா’ பதக்கத்தை நெஞ்சில் தாங்கி, மீண்டும் காக்கி சீருடையில் நாட்டைக் காக்கும் பணியில் நிற்கிறார். இப்படிப் பகைவர்களை தைரியத்துடன் எதிர்கொள்ளும் வீரர்களை எத்தனை முறை வணங்கினாலும் போதாது. இந்த வீரத்துக்கு ஒரு பெரிய சல்யூட்!