پاکستان میں نئے صوبوں کی ضرورت اس لیے ہے کہ جس علاقے کی زمین سے معدنیات نکلیں، جہاں زراعت ہو، جہاں قدرتی وسائل کے خزانے موجود ہوں، وہاں صرف خام مال نکال کر دوسرے علاقوں میں بھیجنے کے بجائے پروسیسنگ یونٹس، کارخانے اور فیکٹریاں قائم ہوں۔ مقامی وسائل سے مقامی صنعت جنم لے، مقامی نوجوانوں کو روزگار ملے اور علاقے کی دولت اسی علاقے کی خوشحالی کا ذریعہ بنے۔ آخر کب تک وسائل ایک علاقے کے ہوں گے اور روزگار کے مواقع کسی دوسرے علاقے میں پیدا ہوں گے؟ نئے صوبوں کی ضرورت اس لیے بھی ہے کہ دور دراز علاقوں کے عوام کو اپنے جائز کاموں کے لیے صوبائی دارالحکومتوں کے چکر نہ لگانے پڑیں، ان کے مسائل ان کی دہلیز پر حل ہوں، ان کے پانی، زراعت، معدنیات اور سیاحت کے وسائل کو ان کی ضروریات کے مطابق ترقی دی جائے اور پسماندہ علاقوں کو بھی ترقی کے برابر مواقع ملیں۔ ہر خطے کی اپنی معاشی صلاحیت، اپنے مسائل اور اپنی ضروریات ہیں؛ تو پھر سب کے لیے ایک ہی انتظامی ڈھانچا کیوں؟ نئے صوبے بنانے کا مقصد نئے حکمران، نئی کرسیاں اور نئے اقتدار کے مراکز پیدا کرنا نہیں، بلکہ وسائل کو روزگار، معدنیات کو صنعت، زمین کو خوشحالی اور محرومی کو ترقی میں بدلنا ہے۔ صوبہ چھوٹا ہو یا بڑا، اصل پیمانہ یہ ہونا چاہیے کہ وہاں کے نوجوان کو روزگار، کسان کو سہولت، سرمایہ کار کو مواقع اور عام آدمی کو بہتر زندگی مل رہی ہے یا نہیں۔ ریاست کی مضبوطی اسی میں ہے کہ ہر علاقے کے وسائل پورے پاکستان کی ترقی میں حصہ ڈالیں اور ہر علاقے کے عوام اس ترقی کے ثمرات بھی اپنی آنکھوں سے دیکھیں۔