𑀯𑀺𑀯𑁂𑀓𑁆 𑀓𑀼𑀫𑀸𑀭𑁆 ⌬Vivek ⌬

5000 ரூபாய் கொடுத்து அடுத்த 5 ஆண்டுகள் தமிழ்நாட்டைக் கொள்ளையடிக்கத் துடிக்கிறது திமுக அரசு; பணத்தைக் கொடுத்து வாக்கைப் பறிக்க முனையும் திமுகவின் திருட்டுத்தனத்திற்கு வரும் தேர்தலில் மக்கள் தக்க பாடம் புகட்டுவார்கள்! @CMOTamilnadu @mkstalin மகளிர் உரிமைத்தொகை என்ற பெயரில் எந்த மாதமும் இல்லாமல், திடீரென்று இன்று 5000 ரூபாயை முன்பணமாக வங்கிக் கணக்கில் வரவு வைத்துள்ளது திமுக அரசு. மக்களின் வரிப்பணம்தான் மீண்டும் மக்களுக்கே வழங்கப்படுகிறது என்றாலும் கடந்த 4 ஆண்டுகளாக இல்லாத வகையில் இந்த ஆண்டு மட்டும் 3 மாத முன்பணம், கோடைகால முன்பணம் என்றெல்லாம் வழங்குவது, தேர்தல் வருவதைக் கணக்கிட்டு மக்களின் வாக்கைப் பறிக்கும் சூழ்ச்சியாகும். கடந்த 2021ஆம் ஆண்டு சட்டமன்றத்தேர்தல் அறிக்கையில், ஆட்சிக்கு வந்தவுடன் அனைத்து பெண்களுக்கும் 1000 ரூபாய் தருவோம் என்று தேர்தல் வாக்குறுதி அளித்த திமுக, முதல் இரண்டரை ஆண்டுகள் அதனைத் தராமல் ஏமாற்றியது. முதல் 30 மாதங்களுக்குத் தரவேண்டிய 30 ஆயிரம் ரூபாயை ஏமாற்றிவிட்டு, தற்போது தேர்தல் வருவதை முன்னிட்டு வெறும் 2000 ரூபாயை மட்டும் கூடுதலாகக் கொடுத்துவிட்டு, மீதமுள்ள 28,000 ரூபாயை ஏமாற்ற நினைப்பது மக்களை முட்டாளுக்கும் இழிசெயலாகும். அதுமட்டுமின்றி, அனைத்து பெண்களுக்கும் உரிமைத்தொகை என்று தேர்தல் அறிக்கையில் கூறிய திமுக, பின்னர் தகுதியுள்ள பெண்களுக்கு மட்டுமே தருவோம் என்று சுருக்கி, இன்றுவரை பல்லாயிரம் பெண்களுக்குத் தராமலும் ஏமாற்றி வருகிறது. இந்த ஆண்டு பொங்கல் பரிசுத்தொகை, கோடைக்காலச் சிறப்புத்தொகை அனைத்தையும் வழங்கும் திமுக அரசு, இதையெல்லாம் சென்ற ஆண்டு வழங்காதது ஏன்? இந்த ஆண்டுதான் மக்களின் துன்பம் திமுக அரசின் கண்களுக்குத் தெரிகிறதா? தேர்தல் வரும்போதுதான் மக்களின் வேதனைக்குரல் திமுக அரசின் காதில் விழுகிறதா? கடந்த 2001 முதல் 2021 வரை தமிழ்நாட்டை மாறி மாறி ஆண்ட திமுக - அதிமுக அரசுகள் வாங்கிய தமிழ்நாட்டின் மொத்த கடன் 5 இலட்சம் கோடியாகும். ஆனால், கடந்த 5 ஆண்டுகால திமுக அரசு, தன்னுடைய மிக மோசமான நிர்வாகத்தால், மேலும் 5 இலட்சம் கோடி கடன் வாங்கி தமிழ்நாட்டின் பொருளாதாரத்தை அதலபாதாளத்தில் தள்ளியுள்ளது. தமிழ்நாட்டு மக்களின் தலையில் 10 இலட்சம் கோடிகள் கடனை சுமத்திவிட்டு, தற்போது ஒரே நாளில் மேலும் 6,500 கோடி கடன் சுமையை ஏற்றியுள்ளது நிர்வாகத்திறனற்ற திமுக அரசு. நீண்ட நாட்களாகத் திட்டமிட்டு, மிகவும் ரகசியம் காத்து ஒரே நாளில் 1.31 கோடி வங்கிக்கணக்குகளில் 5000 ரூபாய் செலுத்துவதில் மிகவும் நேர்த்தியாகச் செயல்பட்ட திமுக அரசு, இத்தனை கவனத்தையும், பொறுப்பையும் சட்டம் ஒழுங்கை காப்பதில் ஏன் காட்டவில்லை? இளைஞர்களின் எதிர்காலத்தை தீர்மானிக்கும் அரசுப்பணி தேர்வுகளைச் சரியாக நடத்துவதில் இத்தனை பொறுப்புடன் திமுக அரசு செயல்படாதது ஏன்? நாள்தோறும் நடைபெறும் படுகொலைகளையும், பாலியல் வன்கொடுமைகளையும் தடுப்பதில் இத்தனை வேகமாகச் செயல்படாதது ஏன்? பல்கிப் பெருகியுள்ள போதைப்பொருள் புழக்கத்தைக் கட்டுப்படுத்துவதில் இத்தனை வேகமாகச் செயல்படாதது ஏன்? சாதிய ஆணவப்படுகொலைக்கு எதிரான சட்டம் இயற்றுவதிலும், இசுலாமிய சிறைவாசிகளை விடுதலை செய்வதிலும் இத்தனை வேகத்தை காட்டாதது ஏன்? தமிழ்நாடு முழுவதும் வீதிக்கு வீதி ஆசிரியர் பெருமக்கள், அரசு மருத்துவர்கள், ஊரகத் திட்டப் பணியாளர்கள், ஊராட்சி செயலர்கள், அரசுக் கல்லூரி கௌரவ விரிவுரையாளர்கள், உதவிப் பேராசிரியர்கள், அங்கன்வாடி பணியாளர்கள், டாஸ்மாக் ஊழியர்கள், கிராம சுகாதாரப் பணியாளர்கள், மாற்றுத்திறனாளிகள், நூலகர்கள், ஊர்க்காவல்படையினர் என அனைத்து தரப்பினரும் தங்களின் பணிப்பாதுகாப்பிற்கும், ஊதிய உயர்விற்கும் அன்றாடம் போராடி வருகின்றனர். நிதிநிலையைக் காரணம் காட்டி அதனையெல்லாம் நிறைவேற்ற மறுக்கும் திமுக அரசு, தேர்தலை முன்னிட்டு ஒரே நாளில் 6,500 கோடி ரூபாயை வாரியிறைக்க மட்டும் எங்கிருந்து நிதி வந்தது? இப்போது மட்டும் நிதி சிக்கல் இல்லாமல் போனது எப்படி? மக்களின் நன்மை குறித்த எந்தச் சிந்தனையும் இன்றி, வெறும் வாக்கு வங்கியை மட்டும் குறிவைத்துச் செயல்படும் திமுக அரசின் இத்தகைய தேர்தல்கால நாடகங்கள் வெட்கக்கேடானது. தமிழ்நாடு அரசின் தற்போதைய மொத்த கடன்சுமை 9.30 இலட்சம் கோடிகளாகும். தமிழ்நாட்டின் மொத்த உள்நாட்டு உற்பத்தியில் (நிஷிஞிறி) இக்கடன் சுமை 26% ஆகும். ஒவ்வொரு ஆண்டும் மொத்த வருவாயில் 56,000 கோடி ரூபாயை (21%) வாங்கிய கடனுக்கு வட்டியாகவே தமிழ்நாடு அரசு செலவிடுகிறது. நடப்பு 2025-26 நிதியாண்டில், மேலும் 1,62,000 கோடி ரூபாய் கடன் வாங்கவும் திட்டமிட்டுள்ளது. தமிழ்நாடு நிதிப்பொறுப்புச் சட்டத்தின்படி 3%-க்குள் இருக்க வேண்டிய நிதிப்பற்றாக்குறை, திமுக அரசின் நிர்வாகச் சீர்கேட்டால் கடந்த 2023-24 நிதியாண்டில் வரம்பை கடந்து 90,430 கோடியாக (3.32%) அதிகரித்தது. அதுமட்டுமின்றி, 2022-23 நிதியாண்டில் 36,215 கோடியாக இருந்த தமிழ்நாடு அரசின் வருவாய் பற்றாக்குறை, 2023-24 நிதியாண்டில் 45,121 கோடியாகவும் உயர்ந்துள்ளது. ஏற்கனவே, ஒடுக்கப்பட்ட மக்களுக்கு வழங்க வேண்டிய பல்லாயிரம் கோடி நிதியை, திமுக அரசு முறைகேடாக உரிமைத்தொகை வழங்கச் செலவிட்டதாகக் குற்றச்சாட்டு எழுந்துள்ளது. அதுமட்டுமின்றி, திமுக அரசு கடனாக வாங்கும் பல இலட்சக்கணக்கான கோடிகளை மாநிலத்தின் உட்கட்டமைப்பை மேம்படுத்தும் வளர்ச்சித் திட்டங்களில் பயன்படுத்தாமல், தொலைநோக்கு இல்லாத வெற்றுக் கவர்ச்சித் திட்டங்களில் வீணடிப்பதாக இந்தியத் தலைமை கணக்கு அறிக்கையும் (சிகிநி) சுட்டிக்காட்டி உள்ளது குறிப்பிடத்தக்கது. உபரி நிதிநிலை அறிக்கை (பட்ஜெட்) தாக்கல் செய்யும் நல்ல அரசுகூட, இத்தனை கோடிகளை ஒரே நாளில் வீணடிக்காது. ஆனால், பற்றாக்குறை நிதிநிலை அறிக்கை தாக்கல் செய்யும் திமுக அரசு, வாங்கிய கடனுக்கு வட்டி கட்டவே, மேலும் பல்லாயிரம் கோடிகளைக் கடனாக வாங்கும் மோசமான நிலையில் தமிழ்நாட்டை வைத்துள்ள திமுக அரசு இப்படி 6,500 கோடி ரூபாயை எந்தத் தொலைநோக்கு சிந்தனையும் இல்லாமல் ஒரே நாளில் வாரியிறைப்பது, மக்களை ஏமாற்றி அடுத்த அடுத்த 5 ஆண்டுகள் தமிழ்நாட்டைக் கொள்ளையடிப்பதற்குச் செய்கின்ற அப்பட்டமான சூழ்ச்சியேயாகும். கடந்த 2021 சட்டமன்றத் தேர்தலின்போது ஆட்சிக்கு வந்தால் தமிழ்நாட்டு மாணவர்களின் கல்விக்கடனை முழுமையாக இரத்து செய்வோம் என்று கொடுத்த வாக்குறுதியை இன்றுவரை நிறைவேற்றாமல், பல இலட்சக்கணக்கான மாணவர்களை ஏமாற்றி வரும் திமுக அரசு, தற்போது தேர்தல் வருவதை முன்னிட்டு 5000 ரூபாய் பணத்தைக் கொடுத்து, மக்களை ஏமாற்றி வாக்கைப் பறிக்க முனையும் திருட்டுத்தனத்திற்கு வரும் தேர்தலில் தமிழ்நாட்டு மக்கள் தக்க பாடம் புகட்டுவார்கள்! - செந்தமிழன் சீமான் தலைமை ஒருங்கிணைப்பாளர் நாம் தமிழர் கட்சி

பெருந்தலைவர் காமராசர் பல்கலைக்கழகத்தை மூடும் நிலைக்கு தள்ளிவிட்டு, கல்வியிற் சிறந்த தமிழ்நாடு என்று வீண்பெருமை பேச வெட்கி தலைகுனிய வேண்டும்! @CMOTamilnadu @mkstalin மதுரையில் பெருந்தலைவர் தாத்தா காமராசர் அவர்களின் பெயரில் இயங்கி வரும் பல்கலைக்கழகம் கடும் பொருளாதார நெருக்கடியால் மூடும் நிலைக்கு தள்ளப்பட்டுள்ளது மிகுந்த மனவலியைத் தருகின்றது. கல்வியிற் சிறந்த தமிழ்நாடு என்று நடிகர்களைக் கொண்டு வெற்று விளம்பரம் செய்துவிட்டு, கல்விக்கண் திறந்த கடவுள் பெயரில் அமைந்த பல்கலைக்கழகத்தைச் செயற்பட முடியாதபடி முடக்குவது வன்மையானக் கண்டனத்துக்குரியது. சங்கம் வைத்து தமிழ் வளர்த்த மதுரை மண்ணில் அமைந்துள்ள காமராசர் பல்கலைக்கழகம் (Madurai Kamaraj University) 1966 ஆம் ஆண்டு தொடங்கப்பட்டு, பெருந்தலைவர் மறைவுக்குப் பிறகு அவருடைய நினைவாக 1978 ஆம் ஆண்டு காமராசர் பல்கலைக்கழகம் என்று பெயர் சூட்டப்பட்டது. 18 பாடசாலைகளுடன், 72 திணைக்களங்களை கொண்டுள்ள இப்பல்கலைக்கழகமானது 109 இணைக்கப்பட்ட கல்லூரிகளையும், 7 மாலைநேரக் கல்லூரிகளையும் உறுப்பு கல்லூரிகளாகக் கொண்டுள்ளது. பல்கலைக்கழக நிகர்நிலை குழுவினால் வழங்கப்படும் ஆற்றல்சார் பல்கலைக்கழகத்திற்கான தகுதியையும் பெற்றுத் திகழ்வதோடு, 60 ஆண்டுகளாக தமிழ்நாட்டு இளம்பிள்ளைகள் உயர்கல்வி பயில வாய்ப்பளித்து பல இலட்சம் பட்டதாரிகளையும் உருவாக்கிய பெருமைக்குரியது. அத்தகு சிறப்பு வாய்ந்த காமராசர் பல்கலைக்கழகம் அண்மைக்காலமாகக் கடும் நிதி நெருக்கடி காரணமாக முற்று முழுதாக முடங்கிப்போயுள்ளதுதான் பெருங்கொடுமையாகும். காமராசர் பல்கலைக்கழகம் மட்டுமல்ல, தமிழ்நாடு அரசின் கீழ் இயங்கும் பல்வேறு பல்கலைக்கழகங்களில் பணியாற்றும் ஊழியர்களுக்கும் ஊதியம் முறையாக வழங்கப்படுவதில்லை. பல்கலைக்கழகத்தின் ஒவ்வொரு ஆண்டுக்குமான தணிக்கை அறிக்கைகள், நிதி நெருக்கடிகள் ஏற்பட பல காரணங்களைச் சுட்டிக்காட்டுகின்றன. அவற்றில் முதன்மையானது 17.05.1999 நாளிட்ட தமிழ்நாடு அரசின் அரசாணையின்படி பல்கலைக்கழகப் பணியாளர்களுக்குத் தரப்படும் சம்பளம் மற்றும் படிகள் ஆகியன தமிழ்நாடு அரசால் ஈடு செய்யப்பட வேண்டும். ஆனால், கடந்த 2007 ஆம் ஆண்டிலிருந்து 2024 ஆம் ஆண்டு வரை தமிழ்நாடு அரசால் மதுரை பல்கலைக்கழகத்திற்கான ஈட்டுநிதி வழங்கப்படவில்லை. கடந்த 2007 மற்றும் 2008 ஆம் கல்வி ஆண்டில் மட்டும் தமிழ்நாடு அரசால் பல்கலைகழகத்திற்குத் தரவேண்டிய நிலுவைத் தொகை 7 கோடியே 74 லட்சம். அது கடந்த 17 ஆண்டுகளில் அதிகரித்து 2023-24 ஆம் நிதி ஆண்டுகளில் ஏறத்தாழ 300 கோடி ரூபாய் அளவிற்கு நிலுவைத்தொகை தமிழ்நாடு அரசால் தரப்படவில்லை. ஒருவேளை நிலுவைத்தொகை உரிய நேரத்தில் வழங்கப்பட்டிருந்தால் இன்றைய நாளில் 500 கோடி அளவிற்கு உபரித்தொகை பல்கலைக்கழகத்தில் கையிருப்பாக இருந்திருக்கும் எனவும் தணிக்கை அறிக்கை கூறுகிறது. ஆனால், நிலுவைத்தொகையைத் தராமல் இருப்பதற்கு, பல்கலைக்கழகத்தில் பணியாளர்கள் நியமனத்தில் விதிமீறல் நடைபெற்றதே காரணம் என அரசு கூறுவதை ஒருபோதும் ஏற்க முடியாது. பணி நியமனத்தில் முறைகேடுகள் நடைபெற்றபோதே அதனை தமிழ்நாடு அரசு தடுக்கத்தவறியது ஏன்? பணி நியமனத்தில் முறைகேடு என்றால் அதனை ரத்து செய்ய நடவடிக்கை எடுக்க வேண்டுமே தவிர, வழங்க வேண்டிய நிதியை நிறுத்துவது எவ்வகையில் நியாயமாகும்? மேலும், மதுரை காமராஜர் பல்கலைகழகத்தின் தொலைதூரக் கல்விதுறை 2010 ஆம் ஆண்டில் ஏறத்தாழ 50,000 மாணவர்களைக் கொண்டிருந்தது, அதே துறை 2023 ஆம் ஆண்டில் வெறும் 6000 மாணவர்களையேக் கொண்டுள்ளது. இதற்கு முழுமுதற் காரணம் இந்திய ஒன்றிய அரசின் பல்கலைக்கழக மானியக் குழு, தொலைதூரக் கல்வியானது அந்தந்த மாநில எல்லைக்குள் மட்டுமே இருக்கவேண்டும் என்ற புதிய விதியை நிர்ணயித்து, பல்கலைக்கழகத்தில் அதிகளவில் மாணவர் சேர்க்கையைத் தடுத்து நிறுத்தியதேயாகும். இதனால் பல்கலைக்கழகத்தின் வருமானம் பெருமளவு குறைந்தது. பல்கலைக்கழக மானியக்குழு சட்டம் 1956 இன் படி, அவ்வாணையத்தின் மிக முக்கிய நோக்கங்களில் ஒன்று பல்கலைக்கழகங்களின் பொருளாதாரத் தேவைகளை நிறைவு செய்வதாகும். ஆனால், இந்திய ஒன்றிய அரசின் புதிய விதிமுறை அதற்கு நேரெதிராக நிதியைக் குறைக்கச் செய்து, மாணவர்களின் கல்வியை முடக்கியுள்ளது. இதற்கு இந்திய ஒன்றியத்தை ஆளும் பாஜக அரசே முழுக்காரணமாகும். பல்கலைக்கழக மானியக்குழு பல்கலைக்கழகத்தின் சிறகுகளை வெட்டாவிட்டால், காமராஜர் பல்கலைக்கழகம் பத்து மடங்கு கூடுதல் நிதியைத் தொலைதூரக் கல்வித்துறையின் மூலம் ஈட்டியிருக்க முடியும். பல்கலைக்கழகமும் மூடும் நிலைக்கு தள்ளப்பட்டிருக்காது. அதுமட்டுமின்றி தமிழ்நாட்டு பல்கலைக்கழகங்களின் ஆடம்பரச் செலவுகளைக் கட்டுப்படுத்த தவறியதோடு, பல்கலைகழகப் பணியாளர்களுக்கான ஒழுங்கு நடவடிக்கை விதிகளையும், பணிவிதிகளையும் ஏற்படுத்த தவறிய தமிழ்நாடு அரசின் அலட்சியமும் பல்கலைக்கழக நிர்வாகம் சீர்கெட மற்றுமொரு காரணமாகும். மதுரை காமராஜர் பல்கலைக்கழகத்தில் நான்கு சிண்டிகேட் உறுப்பினர் பதவி கடந்த 15 ஆண்டுகளாக நிரப்பப்படவில்லை. இது தவிர பட்டதாரிகளுக்கான 15 உறுப்பினர் பதவிகளும் பதினைந்து ஆண்டுகளுக்கு மேல் காலியாக உள்ளன. உதவிப்பேராசிரியர் பணியிடங்களும் நிரப்பப்படாமல், தற்காலிகப் பணியாளர்கள் நியமிக்கப்பட்டுள்ளனர். அவர்களுக்கும் ஊதியம் முறையாக வழங்கப்படாததால் போராட்டத்தில் ஈடுபட்டு வருகின்றனர். இது மாணவர்களின் உயர்கல்வியில் பெரும்பாதிப்பை ஏற்படுத்தியுள்ளது. அண்ணா பல்கலைக்கழகம், டாக்டர் அம்பேத்கர் சட்டப் பல்கலைக்கழகம், பாரதியார் பல்கலைக்கழகம், பாரதிதாசன் பல்கலைக்கழகம், காமராஜர் பல்கலைக்கழகம், தமிழ் பல்கலைக்கழகம், திருவள்ளுவர் பல்கலைக்கழகம் உள்ளிட்ட தமிழ்நாட்டின் தலைசிறந்த பத்திற்கும் மேற்பட்ட பல்கலைக்கழகங்களில் துணைவேந்தர் பதவிகள் இன்னும் நிரப்பப்படவில்லை. பாஜக ஆளுநர் - திமுக அரசின் மோதல் போக்கு தமிழ்நாட்டு பல்கலைக்கழகங்களின் நிர்வாகத்தை முற்று முழுதாகச் சீரழித்து தமிழ்நாட்டு மாணவர்களின் எதிர்காலத்தை கேள்விக்குறியாக்கியுள்ளது. தமிழ்நாட்டில் உள்ள பெரும்பாலான பல்கலைக்கழகங்களை இத்தகைய மோசமான நிலையில் வைத்துவிட்டு கல்வியிற் சிறந்த தமிழ்நாடு என வீண் தற்பெருமை பேசுவது வெட்கக்கேடானது. பல்கலைக்கழக வேந்தராக தமிழ்நாட்டு முதல்வரே செயல்படுவார் எனும் நிலையை எட்டிய பிறகும் திமுக அரசு பல்கலைக்கழகங்களின் நிர்வாகத்தைச் சீர்படுத்தி, நிதிநிலைமையை மேம்படுத்த எவ்வித நடவடிக்கையும் எடுக்காதது ஏன்? இதற்குப் பெயர்தான் திராவிட மாடலா? இதுதான் திமுக அரசு உயர் கல்வியிற் சிறந்த மாநிலமாக தமிழ்நாட்டை மாற்றியுள்ள முறையா? என்ற கேள்வி எழுகிறது. ஆகவே, தமிழ்நாடு அரசு மதுரை காமராசர் பல்கலைகழத்திற்குத் தரவேண்டிய நிலுவைத்தொகையை உடனடியாக வழங்கி மூடப்படும் நிலையிலிருந்து பல்கலைக்கழகத்தை மீட்க வேண்டும். மேலும், சீரழிந்துள்ள தமிழ்நாட்டு பல்கலைக்கழகங்களின் நிர்வாகத்தையும் சீரமைத்து, நிதி நிலைமையை மேம்படுத்தி, காலிப்பணியிடங்களை விரைந்து நிரப்ப வேண்டுமெனவும் வலியுறுத்துகிறேன். - செந்தமிழன் சீமான் தலைமை ஒருங்கிணைப்பாளர் நாம் தமிழர் கட்சி