نادي معجبي كابكوم العرب 💙💛

🚨 مقابلة مهمة عن مستقبل سلسلة Resident Evil! نُشر اليوم مقال ياباني يستعرض مقابلة أجرتها وكالة كيودو مع (جون تاكيوتشي)، أحد كبار المسؤولين التنفيذيين في كابكوم، واللي شارك في تطوير السلسلة من بدايتها. تكلم عن مستقبل السلسلة خلال العشر سنوات القادمة، والريميكات، وكشف بعض الأمور المثيرة للاهتمام. ترجمت لكم أبرز ما جاء في المقابلة من الياباني للعربي، ورتبته على شكل سؤال وجواب 👇 س: هل قصة Resident Evil قربت تنتهي؟ ج: قصة السلسلة ما كانت مخطط لها بالكامل من البداية، وكانت تتوسع مع كل جزء. لكن من وقت التخطيط لريميك RE2 وضعنا خطة تمتد لعشر سنوات، ومع إصدار Requiem انتهت المرحلة الأولى من الخطة. وأتوقع إن القصة توصل لنقطة حسم خلال العشر سنوات القادمة. س: طيب كم جزء جديد راح نشوف خلال هالفترة؟ ج: ما أقدر أحدد العدد حتى ما أحرق عليكم المفاجآت، لكن أقدر أقول إنها مو لعبة واحدة، بل عدة ألعاب. س: ليش اخترتم إصدار الريميكات بهذا الترتيب؟ ج: الترتيب مو عشوائي، وله معنى. أجرينا تغييرات بسيطة على قصص الأجزاء الأصلية، وهالتغييرات راح تتضح أهميتها مع الوقت. واللي يلعب جميع الريميكات ممكن يفهم سبب اختيارنا لهذا الترتيب. س: وش أخبار ريميك Code Veronica؟ ج: فريق تطوير RE4 Remake هو اللي يشتغل عليه، وتطويره صعب جدًا، واضطرينا نعيد العمل على بعض الأجزاء مرتين أو ثلاث. نعرف قد إيش اللعبة مهمة لجمهورها، وعشان كذا ما نقدر نقدم ريميك أقل من المستوى المطلوب. س: هل أحداث Code Veronica راح يكون لها دور أكبر بالقصة؟ ج: الجزء الأصلي كان أقرب لقصة جانبية، لكن مع الريميك راح يقدر اللاعبون يفهمون أهمية أحداثه وعلاقتها بالقصة الرئيسية بشكل أوضح. س: طيب وش سالفة سبنسر والتغييرات اللي نشوفها في الريميكات؟ ج: التغييرات اللي أضفناها على قصص الأجزاء الأصلية راح يكون لها معنى أكبر مع تقدم السلسلة، وممكن اللاعبين أخيرًا يتعرفون على حقيقة سبنسر. س: هل فيه أسرار ما انتبه لها اللاعبون في Requiem؟ ج: حرف Q في اسم Requiem يحمل معنى مزدوج، ومن ضمن معانيه الإشارة للرقم 9. وفيه أيضًا رابط بين أحداث Requiem وResident Evil 7، وهذا الرابط راح تكون له أهمية مع تطور القصة مستقبلًا. س: كيف كانت تجربة تطوير Resident Evil 7؟ ج: المشروع كان يواجه مشاكل، وفي يوم 4 يناير استدعاني رئيس مجلس الإدارة وطلب مني تولي مسؤولية التطوير. جمعت عددًا من المطورين اللي اشتغلوا على الجزء الأول، وكان هدفنا نرجع السلسلة لجذورها ونستعيد إحساس الرعب. وكنت مستعد أقدم استقالتي لو فشل المشروع، لهالدرجة كنت مؤمن بالتوجه الجديد. س: هل سبق وواجهتم اعتراضات داخل كابكوم على قرارات التطوير؟ ج: نعم، حتى التغييرات الكبيرة اللي حصلت في Resident Evil 4 واجهت اعتراضات داخل الشركة. س: وش رأيكم باستخدام الذكاء الاصطناعي في تطوير الألعاب؟ ج: ممكن نستفيد منه كأداة تساعدنا في عملية التطوير، لكن ما نبي نعتمد عليه في الجانب الإبداعي أو نخليه يتولى صناعة الألعاب بدل المطورين. وتطرق كذلك لكواليس تطوير الجزء الأول، وكيف استفاد فريق Requiem من تقنيات مسح الشخصيات وأساليب إنتاج مستخدمة في هوليوود. وبكذا انتهت أبرز التفاصيل اللي جاءت في المقابلة. اللافت بالنسبة لي كلامه عن إن ترتيب الريميكات مقصود، وإن التغييرات اللي شفناها راح يكون لها معنى مستقبلًا، خصوصًا مع حديثه عن سبنسر ونهاية القصة خلال عشر سنوات. وش تتوقعون كابكوم تخطط له؟ 👀 المصدر: وكالة كيودو اليابانية، والمقال المنشور في Horror Gate Magazine.