Xx_Bashaier_xX

شلون تكون طالب جامعي ممتاز من بداية مشوارك الاكاديمي. دخول الجامعة مختلف عن المدرسة. محد راح يلاحقك على واجب ومحد راح يذكرك كل يوم إن عندك اختبار…. فجأة أنت المسؤول عن وقتك وحضورك ودراستك ومستواك. إذا كنت طالب مستجد اقدم لك بعض النصائح اللي قد تفيدك. ١) لا تبدأ الجامعة بعقلية "أبي أنجح وبس". النجاح مهم لكن حاول تفهم وتتعلم. المعدل يفتح لك أبواب لكن المعرفة والمهارات هي اللي راح تبقى معاك و تستفيد منها في مهنتك خصوصاً اذا بتكون معلم. للاسف كثير من الحسابات الجامعية تقودك الى كيف تنجح بمعدل لكن من دون فائدة اكاديمية حقيقية. ٢)الحضور مهم أكثر مما تتوقع. مو كل شيء موجود بالسلايدات. أحيانا الدكتور يشرح نقطة بطريقة بسيطة بالمحاضرة وتكتشف بعدين إنها أساس موضوع كامل. ٣)لا تخلي الدراسة تتراكم. أكبر غلطة إنك تقول"بدرس قبل الاختبار" لو خصصت وقت بسيط بعد كل محاضرة للمراجعة فترة الاختبارات راح تكون أخف عليك. ٤)إذا ما فهمت اسأل و لا تستحي من السؤال. الدكتور يفضل الطالب اللي يحاول يفهم اكثر من الطالب اللي ساكت طول الفصل وبعدين يسأل قبل الاختبار بيوم. ٥)تعلم شلون تتعلم…مو كل دراسة معناها قراءة الكتاب عشر مرات. جرب تختبر نفسك وتحل أسئلة او تشرح المعلومة بصوتك وترجع للنقاط اللي فعلاً ما تعرفها. ٦)اختار الناس اللي حولك بعناية. الجامعة مو دراسة فقط. الناس اللي تقضي وقتك معاهم ممكن يرفعون طموحك أو يخلون الاستهتار شيء طبيعي بالنسبة لك. ٧)كون علاقة محترمة مع أساتذتك مثلا شارك، اسأل، ناقش بأدب، وروح بالساعات المكتبية إذا احتجت مساعدة مو بس علشان الدرجات لكن لأنك قد تحتاج مستقبلاً نصيحة أكاديمية، توصية، أو فرصة بحثية. ٨) لا تقارن بدايتك بنهاية شخص ثاني. بتشوف طالب معدله أعلى وطالب لغته أفضل وشخص عنده خبرة أكثر منك. خذ منهم دافع لكن لا تخلي المقارنة تستهلكك. ٩) لا تخلي المعدل هو كل حياتك الجامعية. حافظ على معدلك لكن تعلّم لغة وطوّر مهارة وشارك في نشاط وجرب البحث العلمي حتى لو انك طالب في مرحلة البكالوريوس واقرأ خارج تخصصك. الجامعة فرصة لبناء نفسك مو مجرد جمع درجات. ١٠)وأخيراً…الطالب الممتاز مو بالضرورة أذكى طالب في القاعة. في كثير من الأحيان هو الطالب اللي يحضر، يسأل، ينظم وقته، يتعلم من أخطائه، ويستمر حتى لما يكون الفصل صعب. ابدأ صح من أول سنة. العادات الصغيرة اللي تبنيها اليوم ممكن تصنع فرق كبير في آخر سنة من الجامعة. اسأل الله لكم التوفيق ✨