Eng.Akram .

مساء الرضا قصة وعبره أنا كنت شغال شفت مسائي وحصل قدامي موقف خلاني أخاف تعدي عليا ليلة من غير ما أقول الحمد لله. وأنا في فترة الجامعة كنت شغال في صيدلية في قريتي شفت مسائي عشان الجامعة، وفي يوم من الأيام كانت الساعة داخلة على ١١ بليل وبنقفل حسابات الصيدلية عشان نروح. أنا فاكر اليوم ده كويس قوي، كان الشارع هادي لأول مرة والجو فيه حاجة غريبة كده، وإحنا قاعدين بنقفل الحسابات دخل علينا راجل كبير تقريبًا سنه يعدي الـ٧٠ سنة، كان ضهره محني ووشه عليه شقى الـ٧٠ سنة اللي فاتوا وكان لابس جلابية قديمة ولفف حوالين رقبته شال أبيض. لقيته داخل علينا بابتسامة خفيفة مدارية حاجات كتير وراها، وبيمد إيده للدكتور اللي أنا شغال معاه وكانت بتترعش وبيقوله: - شوفلي الدوا ده يا دكتور؟ وقتها الدكتور أخد الروشتة وبدأ يقول العلاج وبدأنا نتحرك نجيب العلب وإحنا بنكتب الاستخدام عليها لقيت الراجل بيقول بنبرة كلها حزن: - أنا مبعرفش أقرأ، ارسملي عليهم لو الصبح حط شمس ولو بليل حط قمر، معلش يا ابني أنا عايش لوحدي. الدكتور ابتسم له وهزرنا معاه والدكتور جمعهم كلهم في كيس وحسبهم على الجهاز ولف للراجل وقاله: - كل الدوا كده معاك يا حاج والحساب كله 845ج. وقتها منساش نظرة الراجل هتفضل محفورة جوا عقلي. الراجل وقف ثواني بيفكر وبدأ يحط إيده في جيب الجلابية ويطلع فلوس وورق قديم كده وبدأنا نحسبله الفلوس، كانت 280ج كل اللي معاه. الراجل بص للفلوس وللدكتور بنظرة وابتسم ابتسامة خفيفة وأنا لاحظت عينه بتلمع من الدمعة، لقيته مد إيده وفتح الكيس وطلع منه علبتين وقال: - معلش يا ابني احسبلي علبة المسكن دي بس، ومش مهم الباقي ولما ربنا يفرجها هاجي أخده. في اللحظة دي أنا واقف مصدوم، إزاي شخص واقف بيفاصل في عمره وصحته، وعايز يسيب دواء الجلطة عشان معاهوش تمنه وقبل ما أنا أستوعب الصدمة أو أنطق. لقيت الدكتور صاحب الصيدلية عمل لقطة تُدرس بجد، سحب الفلوس ورجعها في جيب الراجل بالراحة وأخد كيس الدواء كله وقفل عليه وحطه في إيد الراجل وقاله بابتسامة وقلب راضٍ: - عيب كده يا عم الحج، أنت ناسي إنك ليك حساب عندنا ولا إيه؟ خد علاجك كامل ومتقلقش الروشتة دي حسابها مدفوع كله من فاعل خير، وفلوسك دي خليها معاك بس متخلكش طماع وادعيلنا بس. الراجل مكنش مصدق، واقف يبص للدكتور وفجأة لقيته وانفجر في العياط بصوت مسموع، وبقى يرفع إيده للسما وهو بيبكي ويدعيلنا بدعوات من قلبه. أنا فضلت واقف مكاني أفكر في الموقف ده، لحد ما لقيت الدكتور قالي كلام عمري ما هنساه طول ما أنا عايش: - شايف اللي حصل ده يا أحمد؟ نفسي ناس كتير تشوفه وتفهمه. وقتها رديت عليه وقلتله: - ليه يا دكتور؟ موقف عادي وعدى!! وقتها ابتسم وقالي: - مش عادي خالص، إحنا ساعات يا أحمد بنبقى واقفين هنا وبنزعل على حاجات تافهة خالص، أبسطها بنعترض على الأكل بتاعنا وبننسى نحمد ربنا أصلًا إن متوفر لينا الأكل ده. وساعات بننسى إن أعظم وأغلى نعمة يمتلكها الإنسان الصحة يا أحمد. إنك تصحى الصبح وتعيش يومك وتتنفس من غير ما تحس بألم، إنك تمشي في يومك ومش محتاج لجرعة دوا تخليك تكمل يومك. وختم كلامه بأجمل جملة أنا سمعتها: - صُن نعم ربنا عليك بالحمد والشكر عشان تدوم عليك، ويلا بقى عشان أنت أخدت من وقتي كتير واتأخرنا. بقيت أفكر في كلامه طول ما أنا مروح في الطريق، وكل كلامه نزل عليا كأنه قلم فوقني من غيبوبة المقارنات التافهة اللي بنقارنها مع غيرنا. وصلت بيتنا، لقيت أبويا وأمي نايمين في أمان الله مش موجوعين ولا تعبانين والحمدلله ربنا يديمها علينا نعمه وإخواتي في أوضهم نايمين مستورين ومرتاحين. اللحظة دي خلتني أقف أحمد ربنا على النعمة دي، ودخلت أوضتي وقفلت الباب وقعدت ودموعي نزلت مني وبقيت بقول: - يا رب أنا آسف.. سامحني على كل لحظة اتعودت فيها على نعمتك ونسيت أشكرك، الحمد لله يا رب على نعمة العافية، والحمد لله على نعمة السقف اللي إحنا مطمنين تحته، والحمد لله إننا بننام شبعانين ومستوريين وكويسين. ومن وقتها عرفت إن الرزق الحقيقي مش هو المظاهر والفلوس الكتير اللي بنجري وراها، الرزق الحقيقي هو إنك تدخل بيتك بالليل وتنام وأنت صحتك وأهلك كويسين ومستورين. والله الحمد لله على الستر والصحة اللي إحنا فيهم حاليًا، لأن الستر ده فيه ناس بتدفع عمرها ودموعها في الشوارع عشان تطوله دقيقة واحدة. وخليك فاكر دايمًا: ﴿وَإِن تَعُدُّوا نِعْمَتَ اللَّهِ لَا تُحْصُوهَا ۗ إِنَّ اللَّهَ لَغَفُورٌ رَّحِيمٌ﴾ #قصة_وعبرة_مع_أحمد