Dr Abdul Hameed

"عرفان صدیقی" 2013 کے الیکشن میں جن دنوں مسلم لیگ کی میڈیا کیمپین پر کام کر رہا تھا، انہی دنوں عرفان صاحب سے ملاقات ہوئی، انہیں ویسا ہی پایا جیسا ان کے کالم پڑھ کر ایک خاکہ بنا ہوا تھا، جس کا ایک بیک گراؤنڈ ہے۔ ایک وقت تھا کہ اخبار بکنے کی ایک بڑی وجہ کالم نگار ہوا کرتے تھے۔ عطا اللہ قاسمی و نذیر ناجی نوائے وقت میں لکھتے تھے، پھر ناجی جنگ چلے گئے اور نوائے وقت میں عباس اطہر اور عرفان صدیقی آ گئے۔ پھر قاسمی بھی جنگ چلے گئے اور اطہر صاحب ایکسپریس کے مدیر بن گئے۔ پیچھے نوائے وقت میں صرف عرفان صاحب بچے۔ اسی نوائے وقت کے دور سے ہی انہیں پڑھنا شروع کیا۔ میری اردو ہمیشہ سے کچھ بہتر تھی لہذا عرفان صاحب کے کالم پڑھ کر لطف آتا، لیکن یہ احساس بھی تھا کہ ان کی زبان آسان فہم نہیں۔ ان کے کام عموما اس طنز اور سنسنی سے محروم ہوتے تھے جو کسی نہ کسی صورت باقی سب کا خاصہ تھا۔ کالم کی زبان بھی نہایت اعلی ہوتی تھی، یوں گماں ہوتا تھا جیسے کالم کو کوئی ادبی صنف سمجھ کر لکھتے ہیں۔ یہی وجہ ہے کہ مجھے یقین ہے کہ ان کی ریڈرشپ ناجی، قاسمی اور اطہر صاحب سے کافی کم ہو گی۔ عرفان صاحب کا تعلق اس قبیلے سے تھا جو بھرپور اختلاف پر بھی شائستگی کا دامن ہاتھ سے نہیں چھوڑتے تھے۔ بدقسمتی سے بہت سے معاملات میں اپنی ذاتی پسند ناپسند، خاص مذہبی اور سماجی سوچ سے باہر نہ نکل پائے؛ لیکن انکا اظہار، اپنے کسی تعصب کی شدت کی بحث سے قطع نظر، نہایت دھیما اور شگفتہ تھا۔ ایسی دوسری شخصیت غامدی صاحب کی نظر آتی ہے۔ ان سے پہلی بار ملاقات کرتے ہوئے کوئی حیرانگی نہ ہوئی کیونکہ ان کی شخصیت بھی ویسی ہی تھی جیسی ان کی تحاریر۔ 2013 کی الیکشن کمپئین کے دوران میاں صاحب اور مریم صاحبہ کے علاوہ، دو ہی شخصیات تھیں جنہوں نے کسی ایک بھی اشتہار میں کوئی منفی کمنٹ نہ دیا، ایک عرفان صاحب اور دوسرے پرویز رشید صاحب۔ عرفان صاحب کے بولنے کا انداز اس قدر اچھا تھا کہ ایک میٹنگ میں میرے ساتھ بیٹھے ایک صاحب جو انہیں نہیں جانتے تھے انہیں سن کر پوچھنے لگے Who is this wise gentleman کچھ روز بعد فون پر کامیاب کیمپین پر مبارک باد بھی دی۔ یہ میرا ان سے آخری براہ راست رابطہ تھا۔ اس کے بعد ایک دو محافل میں ملاقات ہوئی لیکن کوئی بات چیت نہ ہو سکی۔ سال ہا سال ایک طویل عرصے تک عرفان صاحب کے ہزاروں کالم پڑھے، یاد نہیں پڑتا کہ کبھی ایک بار بھی انکے ہاتھ کا لکھا کوئی ناگوار فقرہ یا لفظ نظر سے گزرا ہو۔ ان کے فلسفے اور سیاست سے لاکھ اختلاف کیا جا سکتا ہے لیکن آج کے دور میں، جب تمیز اور تہذیب دونوں کمیاب ہیں، ان کی شخصیت کے یہی پہلو ان کے حق میں لکھنے کیلئے بہت ہیں۔ خدا غریق رحمت کرے۔

"کیا ڈگریوں کی اہمیت کم ہو رہی ہے؟" پاکستان میں گزشتہ کچھ عرصے سے ڈگریوں کے مقابلے میں سرٹیفیکیٹس کو ایسے پیش کیا جا رہا ہے جیسے یہ کوئی شارٹ کٹ ہے۔ برائے مہربانی حقیقت کو سمجھئے۔ جو نوکریاں ٹکنالوجی کی وجہ سے ختم یا کم ہو رہی ہیں ان میں تو کسی ڈگری یا سرٹیفیکیٹ سے ویسے ہی نوکری نہیں ملے گی۔ مثال کے طور پر دنیا بھر میں جرنلزم کی نوکریاں کم ہو رہی ہیں۔ اسی طرح بہت سی وہ نوکریاں کم ہو رہی ہیں جن کے لیے کبھی ڈگری کی خاص ریکوائرمنٹ تھی ہی نہیں، جیسے data entry آپریٹر، travel ایجنٹ وغیرہ۔ اب آ جائیں ان نوکریوں پر جو بہت زیادہ کم نہیں ہوئیں لیکن ان میں ڈگریوں کی ریکوائرمنٹ ختم ہو رہی ہے؛ جس کی وجہ سے "ڈگری کا فائدہ نہیں" کا شور مچا ہوا ہے۔ ایسی نوکریاں زیادہ تر صرف IT سے متعلق ہیں۔ لیکن اس میں یہ کوئی نہیں بتا رہا کہ ان شعبوں میں ماضی کی ڈگری کے مقابلے میں مستقبل کے سرٹیفیکیٹ سے نوکری حاصل کرنا زیادہ مشکل ہے۔ کیونکہ ڈگری کم نالج کے ساتھ بھی پہلی نوکری کے حصول کا ذریعہ بن جاتی تھی، جبکہ اب مقابلہ بڑھ جانے کی وجہ سے کم سے کم ایسے skill کی بنیاد پر ہی نوکری ملے گی، جس کا معیار بہت بلند ہو گا۔ لہذا چند ماہ کے کسی کورس سے اس شعبے میں کوئی اچھی نوکری نہیں ملنے والی۔ پھر کچھ ایسی skilled نوکریاں ہیں جن کے لیے دنیا میں کبھی بھی ڈگری کی ریکوائرمنٹ نہیں تھی جیسے الیکٹریشن یا پلمبر۔ لیکن یہ کورسز چھ ماہ یا ایک سال میں نہیں ہوتے، اس کے لیے بھی دو دو تین تین سال کی محنت درکار ہے۔ ان سب شعبوں سے ہٹ کر تقریبا ہر شعبے میں ڈگری کی ریکوائرمنٹ قائم ہے اور بہت عرصہ رہے گی۔ مثال کے طور پر آج بھی دنیا کا کوئی سرٹیفیکیٹ انجینئرنگ، آرکیٹکٹ، میڈیکل، نرسنگ، فارمیسی وغیرہ کی ڈگری کا متبادل نہیں۔ قصہ مختصر ٹکنالوجی اور AI کی وجہ سے بلا شبہ نوکریوں میں عمومی کمی واقع ہو رہی ہے، لیکن اس کا مطلب زیادہ سخت مقابلہ اور نوکریوں کا مشکل حصول ہے۔ 3-3 اور 6-6 ماہ کے جن کورسز کو "جادو کی چھڑی" کہہ کر پیش کیا جا رہا ہے، ان سے کوئی اچھی نوکری ملنے کا کوئی چانس نہیں۔ کسی کی باتوں میں آ کر یہ کبھی مت بھولیں کہ وقت کیساتھ کی گئی محنت کا کوئی شارٹ کٹ نہیں، چاہے وہ ڈگری کے لئے ہو یا ٹیکنیکل ٹریننگ کے اور اب اس محنت کی اہمیت ماضی کے مقابلے میں کہیں زیادہ بڑھ چکی ہے۔

دنیا میں کوئی ایک قوم ایسی نہیں جس کے لوگ غیر قانونی کام کا موقع ملنے پر اسکا فائدہ نہ اٹھائیں۔ مجرمان سے بڑے قصوروار وہ سرکاری افسران ہیں جنکی ناک کے نیچے غیر قانونی کام ہو، اور اس سے بڑے مجرم وہ حکمران ہیں جو نشاندہی کے بعد بھی افسران کو سزا نہ دلوائیں۔

زندگی میں بہت بڑوں کو جاننے کا موقع ملا۔ بہت سے کرپٹ و دین فروشوں کو، ایماندار و اصل مذہبی لوگوں سے بھی زیادہ و مکمل مطمئن دیکھا۔ بے ضمیر شخص اپنے مفاد کا جواز پیدا کرنے کی ایسی صلاحیت رکھتا ہے کہ وہ واقعی مطمئن ہوتا ہے، جبکہ سادہ لوح اسکی اسی طمانیت سے دھوکہ کھاتے رہتے ہیں۔