حمد العيباني

وقّف الليل عقرب ساعة البِندول والمتيم نفد صبره من بْعاده للأرق في عيون اللي العشق مدلول طال صمته ، وهمه طال ، وسْهاده بيّن .. وبين طرفٍ بالسهر مكحول جمرةٍ من جحيم النار ، وقّاده في رجالله .. وثم ، والموعد المأمول بيني ، وبين من خذلانها عاده من يوصّل سلامٍ بالوفا مشغول ويبلغ اخت العنود ان الغلا عادِه باقيٍ ، لو على الهجر استدار الحول واقفت بفالها ماهي بنشّاده قالوا عْقوب قال بسدرة الغرمول ياعسى فوقها الامزان هَدّاده وبْشنقها يسيل السيل .. قلت اقول من صميمٍ كثير الوجْد مافاده جعل دار الحبيبه نافع الهملول نوض برقه يسابق صوت رعّاده لين تِحيي عشوب الخايع المسيول ديمةٍ تاخذ إلها اسبوع ، وزّياده وجْد روحي على شوفة هذاك الزول مثل وجْد الغريب اللي عن بْلاده مغترب .. مامعه حيله ، ولا له حول وجْد روحي قريبٍ من تِوجّاده ليتني كنت أعرْف الغيب ، والمجهول كان يمدي غلاك أعرف وش أبعاده ولاصرتي عن يديني بعيدة نول يا شفوف الخفوق ، وغاية مْراده سِعد من تِصبح عْيونه بهاك الزول وان رقد طيّب الله فال مرقاده بين عنقٍ طويل ، وناعمٍ مفلول يتمرجح سوات الطفل بمهاده غير سود العيون اللي لها مفعول عين حرٍ شلع من كفّ هَدّاده تلّ سبقه ، وروّح عقب شاف الجول وضاع يامن يبشّرني بمعواده ساطي الرمش تحت الحاجب المسلول واعنا القلب لا جِرّد من غْماده كم صويب شكى جرحه ، وكم مقتول قاطعٍ مايبيله سَنْ ، وحّداده وان لفى مسمعي منّك حرير القول يرجع القلب ، ويتّكي على شداده كل هرجٍ ربى في شفّتك معسول يِبري الجرح لبطى فوقه ضماده وهرج غيرك ولوْ يْقصّره مملول لو تذلّل لي ، وكثّر توِدّاده أنثري ليل شعرٍ بالندى مبلول أسودٍ ماخذ مْن قلوب حِسّاده النسايم لها قصة مع المجدول لانقضتيه جتْ تنساب منقاده أفهقي سود خصلاته عن المنتول وينظم الليل لك نجماته قلاده مثل نظم الجواهر ، والدُرر ، واللول في سلوك الذهب بكفوف نضّاده أرفلي بالحرير اللي كسا مفتول عود موزٍ ستير الثوب مافاده ثوبٍ احمر من خيوط الشفق مغزول دمّ عفريةٍ يادوب منصاده المطرز يلوق بْقدّك المعزول بس طالع عليك يجنن الساده أضحكي لي بوجةٍ بالرضا مغسول ضحكتةٍ تنتزع من صدري فْواده وإنزلي في حمى صدرٍ مهو مدهول لا مها قد رعت قفره ، ولا غاده قبْل أعرفك ، وفيه المسلمين أنزول مثل عدٍ عليه البدو ، ورّاده وبعد شدّت ضْعونك مامعاي حْلول بدو .. والبدو نزّاله ، وشدّاده فيك مامن عوض بالارض عرض ، وطول حتى لو قالوا النسوان ولّاده