فيه موضوع لاحظته والصراحة لازم اتكلم عنه واتمنى فعلياً يوصل للجميع كل يوم يطلع لك حساب باسم سعودي وصورة تراثية، ويكتب قصة بهالشكل: "تزوجته من ٣ سنين، أول ما طلعنا مطعم قال كل واحد يدفع عن نفسه، قلت عادي.. بعدها لقيت في جواله محادثات مع وحدة ثانية، ولما واجهته قال أنتي اللي قصرتي. والحين أهله يقولون اصبري. وش أسوي؟" وتحتها آلاف الردود: "بخيل اتركيه" "كلهم كذا" "الرجال ما فيهم أمان" 
وبعد يومين نفس القصة بالعكس: "زوجتي تخونني وأهلها يغطون عليها". افتح الحساب، اضغط على تاريخ الانضمام، وشوف الموقع: West Asia 
لا هو سعودي، ولا القصة صارت، ولا الزوج ولا الزوجة موجودين. الفكرة مو قصة وحدة، الفكرة التكرار. 
اليوم تستغربها، بكرة تتعود عليها، بعده تصدق إن هذا واقع بيوتنا، وتبدأ تشك في زوجتك وتشكين في زوجك، وتنكسر الثقة اللي قام عليها مجتمعنا. والأخطر من كذا:
كل رد تكتبه عليه، حتى لو شتمته أو صححت له، يتحول له فلوس. 
تويتر يدفع لأصحاب الحسابات حسب التفاعل والردود، يعني أنت تغضب وهو يقبض. فلا ترد، لا تقتبس، لا تعطيه مشاهدة. 
بلّك وريبورت وكمّل طريقك. ردك عليه = دعم له